العلاقات

 

الانتكاسة

ياسين : اهلا بيكم يا جماعة النهارده في اجتماعنا الجديد وهنبدأ بدعاء السكينة .

اللهم امنحني السكينة لأتقبل الأشياء التي لا أستطيع تغييرها، والشجاعة لتغيير الأشياء التي أستطيع تغييرها والحكمة لمعرفة الفرق بينهما.

انا خديجة مدمنة، 24 سنة .

كلهم : اهلا بيكي يا خديجة.

الروح المسلوبة الجزء الثاني عشر

انا مبطلة من سنة عمري في حياتي ما كنت افكر ان اوصل للحظة اللي انا فيها دلوقتي عمري ما تخيلتها اصلا كنت عنيدة جدا، ومش بس عنيدة مع الناس اللي حواليا لأ ده مع نفسي شخصيا .

حياتي قبل الادمان واللي توصلت ليه في المرحلة  اللي مريت بيها غير حياتي قبل المرحلة ديه، كنت ملتزمة دينيا جدا، كنت علي طريق الدعوة وحفظ القران الكريم.

كنت حد تاني لحد ما انتكست وضليت طريقي اللي كنت فخورة بيه وماشية فيه بسبب اني صاحبت ناس مكانش ينفع اني اقرب منهم كده .

كنت فاكره انهم عادي كل واحد فينا مليان عيوب واخطاء، محدش ملاك ولا شيطان كله، فكنت بتبع النظرية ديه، وكنت فاكرة نفسي اقوي من ان اتاثر بحد او عادات حد، مكنتش فاكرة اني ممكن ادخل في التفاصيل اللي دخلت فيها بالشكل ده .

لما كنت في الجامعة ودخلت سنة اوله فداخله مجتمع جديد، مجتمع مفتوح حاجات كتير ممكن تحصل، فيه الصحبة الصالحة اللي بترفع والصحبة السوء اللي بتنزل بالواحد .

وكان من نصيبي ناس وناس اتعرفت علي ناس كتير بس فيه نوع لقتني بتسحب وراه بعد ما كانت ليا مناهج وعقائد ماشية عليها لقتها بتتشال وللاسف كانت بتتشال بكل بساطة ومكانش فيه تأنيب ضمير حتي..!

مكنتش حاسه اصلا للاسف كأني كنت مغيبة فعليا مش شايفة كلامي ولا شايفة عقيدتي ولا منهجي اللي ماشية عليها ولا ايه حاجة .

كأن كان فيه ستارة سودة علي عنيا في كل مرة كنت بتنازل عن حاجة جديدة، كنت محجبة وقلعت الحجاب كنت محفظة قران طبعا اصبح مفيش الكلام ده، ديني اصبح مش موجود ايماني اصبح لاشئ.

مرة في مرة .. لقيت نفسي علي طريق المخدرات بدأت بالسجارة والشيشة بعدها الخمرة بكل انواعها  والسهر والحفلات والرقص، بعدها الكوكاين والبدرة .

بعدها بقيت مش عارفاني فعلا .. انا مين ...؟

خديجة ... معقولة انا خديجة ..!!

انا كنت فين وبقيت فين .. يمكن الموت كان اهون من اني بقيت فاللي كنت فيه، فعلا لقيت ان الصاحب ساحب صاحبك لو مكانش زيك يبقا سيبه .. لو مكانش يرفعك سيبه .. لانك لو مسبتوش هتكون النهاية مش هتعجبك.

كانت ساعتها صدمة صحابي اللي كانوا شايفين اني قدوة ليهم في الايمان تلاشت تماما، وتلاشت معاهم خديجة اللي كانوا عارفينها، ده غير اهلي .. اهلي كانوا شايفين شيطانة في تصرفاتها وافعالها وطريقتها .. فعلا كانوا بيشبهوني بالشيطان .

لحد ما والدي رجع من السفر وكانت طبعا صدمته فيا لدرجة انه معرفنيش واحنا رايحين نستقبله في المطار .. كان بيقول امال فين خديجة معقول مجتش معاكوا .. كانت صدمته فيا كبيرة جدا فوق اي تصور .

اول ما روحنا كنت معتقدة ان طبعا هيضربني لكن معملش كده هوعمل اكتر من انه يضربني .. كلامه ليا كان خناجر بتقطع فيا ساعتها مكنتش حاسه بنفسي غير وانا بترمي في حضنه وابوس ايده  واطلب منه انه يسامحني .

ساعتها قالي انا مش مهم .. ساعتها قررت ارجع لنفسي تاني .. لخديجة المتدينة الملتزمة عاهدت ربنا اني ابعد عن اي حاجة غلط واني احط رجلي علي اول طريق الصلاح .. واني اتعالج من المخدرات وارجع لخديجة بتاعة زمان .

كلهم : شكرا يا خديجة .