العلاقات

كل اللي هنشوفه مع بعض هو حقيقة مش خيال، حقيقة معظمنا بيعيشها او عاشها أو لسه بعد ما نخلص مع بعض أنا متأكدة أنكم هتفكروا في كل كلمة وكل حرف، ومش بعيد ترسموا قصة من دول في خيالكم، وأنت أو أنتِ تبقوا أبطالها.

                                         

المقدمة "تخاريف ليلية"

           

زي بالظبط ماهخليكوا تفكروا معايا في كل اللي هيحصل وهل هو جزء من الحقيقة ولا من الخيال  ولا ممكن يكونوا الأتنين مع بعض ..!

بس عارفين حتي لو خيال، الخيال هيتحول حقيقة في يوم من الأيام، المهم جهزوا نفسكوا.

في اللحظة دي قررت أكتب وأصور كل حاجة بتعدي قدامي وعيني شيفاها، قررت أنجرف ورا كل فكرة، قررت أعيش في كل حاجة بتحصل وهتحصل وأعيش أي حد جواها، قررت أسمعها وأفهمها وأشاركها معاكوا.

رسائل كتير هتتكتب ممكن تكون انت بطل حروفها، ممكن يكون كلام بيوصفك، وممكن كلام تاني عايز توصف بيه غيرك، ممكن كلام يخلي قلبك يرقص من الفرحة، وممكن تحس فيه ان قلبك مخضوض .. مكتوم، مش عارف حتي يبكي  تخيل ..!

وممكن تتوه مع زحمة الحروف ومتعرفش انت فين ولا ايه اللي جابك هنا .. هو صحيح ايه اللي جابك هنا ..! 

وممكن تشتاق وتفضل تنادي .. وتنادي .. بس تفتكر حد فيهم هيسمعك ..؟

وممكن تفضل تعاتب  لحد ما التفاصيل ترهقك، مش بعيد كمان توجعك، اه في تفاصيل مش بس مرهقة، لأ بتوجع وجدا كمان، تفاصيل كل ما تفتكرها بتبقي عايز تمحيها من دماغك، بتبقي مش قادر تشيل الحمل ده جواك لأنه كبير جدا لدرجه انك كرهته، وانت في الأصل كنت حابه جدا.

انا متأكدة انك متخيل .. ولسه هتتخيل أكتر ..! 

فكنت قد شهدت علي الرثاء والغناء فالتقوا...
وكنت قد شهدت على الملائكة والشياطين فإجتمعوا..
وكنت قد شهدت على الكلمات فتحققت..

بيت كبير يجمع غرف متعددة لكل غرفة حكاية هعيشها وهنعيشها كلنا، خليك جاهز في كل لحظة، خليك فاكر كل حركة، خليك فاكر كل نبرة صوت، كل حركة جسد، خليك حاسس بكل نبضة قلب، وكل رعشة ايد، خليك معايا، خلي عينك معايا، هتفهمني وهتقرب مني اكتر، حتى لو مش هنشوف بعض تاني  أو مش هتسمعني تاني، خليك هنا.