سلمي : انا مبطلة من 25 يوم طول عمري حاسه اني مش زي اي بنت، حاسه اني اقل من اي حد، معنديش ثقة في نفسي تمام، كارهه نفسي بشكل مبالغ فيه، كل صحابي كانوا بيتريقوا عليا ويبعدوا عني، معرفش ليه ..؟
 |
| الروح المسلوبة الجزء الحادي عشر |
بس انا عمري ما عملت ليهم حاجة وحشة عمري ما فكرت اني أذي حد، بس يوم ما فكرت أذي حد .. كان الحد ده انا .
لما كنت بسال ماما كانت بتقولي اني حلوة بس انا مكنتش شايفة ده، ولا حد من صحابي شايف ده بالعكس كانوا كلهم بيحتقروني .
كرهت حياتي كلها وابتديت عشان انسي اللي انا فيه شربت خمرة علي حشيش لحد ما وصلت للبدرة .
كنت بفضل اشرب كتير جدا، ماما مكانتش فضيالي ولا بابا، اصل عندهم اهتمامات تانية للاسف، اه .. عندهم اهتمامات تانية واكبر واهم من بنتهم الوحيدة ، وهي الفلوس.
الفلوس اللي كرهتها هي وهما .. اه كرهتهم اوي، محدش كان بيهتم بيا ولا حد حاسس بيا فيهم، كل اللي في بالهم الفلوس وبس .!
لحد ما بقيت خلاص كارهه وجودي في الدنيا كلها مفيش حاجة افضل عشانها، مفيش حد بيحبني، مفيش حد واقف جمبي، مفيش حد معايا وسند وضهر ليا في الدنيا .
جيت في يوم دعيت ربنا قولتله يارب خليني ابطل اي حاجة وحشة يارب ساعدني.. ساعدني يارب .. لتساعدني لتاخد روحي عشان انا تعبت، خدها يارب.
محستش بنفسي غير وانا مرمية علي الارض واغمي عليا، وبابا وماما لما حسوا بعدم وجودي في وسطهم راحوا اوضتي وفضلوا ينادوا عليا لقوني مش برد، كسروا الباب لقوني مرمية علي الارض .
جريوا بيا علي المستشفي وهناك اتصدموا اني مدمنة، مكانوش مصدقين ان بنتهم الوحيدة مدمنة.
الدكتور قالهم انها مريضة نفسيا ولازم تعرضوها علي دكتور نفسي وكمان لازم تبطل مخدرات .
ودوني لدكتور نفسي، وفنفس الوقت كانت المستشفي اللي انا فيها كان فيها قسم لمعالجة الادمان واتحجزت في المستشفي .
ابتديت العلاج السلوكي كانت مرحلة صعبة جدا عليا في الوقت ده، بس اهم حاجة وصلت ليها وفرحت بيها في المرحلة دي واللي اتعلمته ان بقيت واثقة جدا في نفسي.
حاسه اني بطله لمجرد بقوم كل يوم الصبح وانا مبطله مخدرات، حاسه اني بقاوم نفسي واني قادرة اني اكون قوية، كانت جوايا مفاهيم كتيرة جوايا غلط .
يمكن كمان بعد اللي حصلي ده بابا وماما اتغيروا معايا وبقوا يهتموا بيا ويتكلموا معايا ويعرفوا مشاكلي اول باول، حياتي كمان معاهم اتغيرت، والاهم ان حياتي مع نفسي هي كمان اتغيرت .
بقيت اشوف الدنيا بمنظور تاني تماما، اتغيرت طباعي وطريقة تفكيري، قولت لنفسي هو انا ازاي كنت كده وكنت ازاي بفكر التفكير ده، بس اديت عذر لنفسي اني كنت صغيرة ومش فاهمة الدنيا صح .
حقيقي الواحد لما بيمر بتجارب في حياته بتفرق معاه جدا، بيحس انها سابت اثر وقيمة وبصمة في حياته، تقريبا حياته كلها بتتغير وبتتشقلب علطول.
الاهم من ده كله ثقتي بنفسي رجعتلي، سلمي اللي كل يوم متمسكة بالحياة عن اليوم اللي قبله .
اللهم امنحني السكينة لأتقبل الأشياء التي لا أستطيع تغييرها، والشجاعة لتغيير الأشياء التي أستطيع تغييرها، والحكمة لمعرفة الفرق بينهما.
تعليقات
إرسال تعليق