ورقة وقلم وركزي معايا يا ست الكل، اكتبي عندك مكونات المكرونة بالباشميل، ايه ايه .. خدي هنا، انتي صدقتي .. انتي غلبانة اوي ..؟
بلاش تبقي زنانة .. هتقرفي الراجل وهتقرفي نفسك وهتنكدي عليه وعلى البيت كله ف ليه ها..!
بلاش كل ما يسألك يقولك مالك تقولي مفييش وانتِ بيبقي فيكي وفيكي كمان، مثلا تبقي مضايقة منه ويفضل الراجل يسأل فيكي يا بنتي مالك... برده هي هي كلمة مفيييش.!
 |
| يوميات زوجة نكدية |
صدقيني مش هيشم على ضهر ايده والله ولا هيفتح المنجم وينجم بقى ولا هو عالم الغيب يعني علشان يعرف ساعتك مالك..!
ما هو بالعقل والهدوء كل يمشي، ومفهاش مشكلة والله لما تقوليله على اللي مضايقك وبكل هدوء .
لكن شغل التسويح ده والله ما ينفع يا حجة، فبلاش غتاته وكآبة وحيات عيالك يا شيخة، علشان هي مش ناقصة فعلا..!
بلاش كل شوية كأنك بتعلقيله المشنقة كل ما ينزل مع أصحابه، يا حجة أديله حريته شوية من الطبيعي أن الواحد محتاج يفصل وعهد الله يعني.!
من الطبيعي أن الواحد يحب يغير جو ويغير الروتين اللي متعود عليه، مش لازم خالص يبقي مع ساعتك في كل الأوقات يعني، وتخليه لازق في رجل الكرسي يعني، أديله فرصة انه يشم نفسه خارج حدود تعليماتك الفولازيه عليه، مش عدل ده يا ظالمه.!
لو فاكرة انك هتعملي اللي متعملش في الدنيا وهوب عايزاه يتغير، صدقيني مش هيحصل، استني بس .. اسمعي الكلمتين دول.
بصي ياست الكل .. ما هو لإما تاخديه على عيبه وانتِ متقبلة ده ومتصالحة كمان مع كل عيوبه وراضية بكدا وعلى فكرة هتبقي من القلة اللي كدا لان مفيش حد في الزمن ده كتير بيتقبل العيوب وبحنية كدا مع الواحد وبيكون مُرحب بشخصيته على بعضها كدا.
لإما بقا تنسي فكرة إنك تغيريه ديه تماماً مش هتغير يابنتي وبعدين ديه فكرة فاشلة، وعايزة اقولك انها فكرة متسلطة، يعني ايه يعني تبقي عايزة شخص وفي الآخر تقوليله انا عايزاك تتغير في كذا وكذا وكذا.. الله!
هو فستان هتعدلي فيه ولا بلوزة فصلتيها وطلعت ضيقه عليكِ، ده إنسان ليه مشاعره وصفاته وتربيته ونشأته.
ده كيان ليه خصوصياته وحياته، فلوعايزة حاجات معينه في الراجل اللي عايزاه يكون معاكي ياريت تفكري مليون مرة قبل ما تدخلي الحكاية من أولها لأن ساعتها هتكوني مُلزمة إنك تتقبلي كل شئ فيه لأنه مش هتغير إلا لو هو عايز يتغير، مش انتي اللي تعوزي تغيريه، واخده بالك انتي.!
تعليقات
إرسال تعليق